அவர்கள் பார்வையில் அதுதான் சரி

அதுஎன் தந்தையார் பணியாற்றிய இடம்
எனக்கு அதுதான் புண்ணிய பூமி
சொந்த ஊருக்கு அருகில் இருந்தும் ஒரு நடை எட்டிப் பார்க்க இயலாமல் இருந்த திருத்தலம்
வயிற்றுப் பாட்டிற்காக வெளியிலேயே சுற்றிக் கொண்டு இருந்துவிட்டேன்.
பற்பல ஆண்டுகளுக்குப் பின் அந்த ஊரைத் தேடிக் கொண்டு போனேன்
முன்பு இருந்த இடம் என்று ஊருக்குள் கை காட்டினார்கள். அங்கு இப்போது வெறும் மண்மேடுதான் இரு்க்கும் என்றும் சொன்னார்கள்.
புதிய இடத்தையே தரிசி்த்தேன்..
குழந்தைகளின் மகிழ்ச்சிக்காகச் சில தின்பண்டங்களை அளித்தோம்..
சற்றைக்கெல்லாம் ஊர் கூடிவிட்டது..
” டேய்..செக் பண்ண வந்திருக்காங்கடா.. இன்னிக்கு... தினம் இல்ல.. அதான் கொடி ஏத்தி இருக்காங்களான்னு பார்க்கறதுக்காக வந்தவங்க இவங்க” என்று சிறுவர்கள் கிசுகிசுத்துக் கொண்டதைக் கேட்க முடிந்தது.
நாங்கள், எங்கள் உடை, வாகனம் ஏற்படுத்திய தாக்கம் அது.
வெளியூரிலிருந்து யார் வந்தாலும் விவகாரத்திற்காகவே வருவார்கள் என்கிற கால காலத்து நம்பிக்கை.
நான் அங்கு சென்றிருந்தது
சனவரி 26 ஆம் நாள்..
ஆமாம்..
இந்தியக் குடியரசு நாள்

விந்தை மனிதர்

ஒருதனிமனிதர்
ஆங்கிலம் கண்டு அஞ்சி ஒதுங்கிய நம்முள் பலரையும் போன்றவர்
கணினியில் தாமாகவே பலவற்றைக் கற்றுக் கொண்டவர்
களஞ்சியம் என்ற பெயரில் ஓர் அகராதியை உருவாக்கி இருக்கிறார்
பாருங்கள்..
இதைப் பற்றிச் சிலவரிகளில் சொல்ல வேண்டுமானால்
முகப்பிலேயே
தேடிச் சோறு நிதம் தின்று
என்னும் மகாகவியின் வாக்கைக் குறிப்பிட்டிருக்கிறார்.
பொட்டில்அடித்த மாதிரி இருக்கிறது..
வேடிக்கை மனிதர்கள் மத்தியில்
விந்தை மனிதர்

நட்பும் சுற்றமும்

பற்பல ஆண்டுகளுக்குப் பின் சந்தித்துக் கொள்கிறோம்.
உரையாடலில் கவனம் செலுத்தாமல் தொலைக்காட்சியைப் பார்த்துக் கொண்டிருப்போம்.
ஒரு நிமிடத்தில் முடிக்க வேண்டிய அலைபேசி உரையாடலை ஒரு நாள் வரை நீட்டிப்போம்.
இப்படியெல்லாம் பல விருந்தினர்களை எதிர்கொள்வதால்தான் யாருமே வீடு தேடி வருவதும் இல்லை..நாமும் போவதும் இல்லை.பல வீடுகளில் இதுதான் நிலை.
நான் இந்த இரண்டு தொல்லைகளிலுமிருந்தும் தள்ளியே இருக்கிறேன்.
அதனால்தான் நட்பும் சுற்றமும் என்று சொல்லிக் கொள்ள
நாலு பேர் இருக்கிறார்கள்.

மனப் புழுக்கம்

அதிகமான எண்ணிக்கையில் தீப்பெட்டிப் படங்களை வைத்திருப்பவன் பணக்காரன். மரம் ஏறத் தெரிந்தவன் சகலகலா வல்லவன். மிதிவண்டி ஓட்டத் தெரிந்தவன் அசகாய சூரன். அதிலும் சொந்தமாக வைத்திருப்பவன் ஒரு படி மேலே. புதிதாக வந்த திரைப்படத்தை நகரத்தில் போய்ப் பார்த்துவிட்டு வந்தவன் உண்மையிலேயே கதாநாயகன்.
கொஞ்சம் வளர்ந்த பின்..
அதிகம் பணம் வைத்திருப்பவன்..
சொந்தக் கார்க்காரன்..
பெரிய வேலையில் இருப்பவன்.
வசதியான மாமனாரைப் பெற்றவன்.
இப்படி எல்லாருமே எல்லாக் காலங்களிலுமே தனிமைப்படுத்தப்பட்டே வருகிறார்கள்.
அவனுக்கு நான் தேவலாம் என்று ஆறுதல்பட்டுக் கொள்வதும்..
அவனுக்கு மச்சம் என்று வெந்து புழுங்குவதும் எங்கேயும் எப்போதும் நிகழ்ந்து கொண்டேதான் இருக்கிறது.

எது, யார் கையில்?

நானும் நண்பனும் ஒரே நேரத்தில் அந்த வேலையில் சேர்ந்தோம். எங்களுக்குக் குடும்ப ரீதியிலான வசதி வாய்ப்புகளில் பெரிய வித்தியாசம் இல்லை. இருப்பினும் நான் டெரிகாட்டனில் சீருடை எடுத்திருந்தேன். நண்பன் பருத்தித் துணியில்.
காரணம் கேட்டேன்.
”நீ இதே வேலையில் தொடர்ந்து இருப்பாய்.. அதனால் உனக்கு நீண்டு உழைக்கும் சீருடை தேவை. நான் விரைவில் வெளியில் போய்விடுவேன். ஆகவே இது தற்காலிகம்தான்.. இது போதும்”
என்கிற பதில் வந்தது.
பத்து நாட்களுக்குப் பின் நான் அந்த வேலையை விட்டு வெளியேறிவிட்டேன்.
நண்பன் இன்னும் அதே துறையில்..

விதி ”வலி”யது

கல்லுாரி நாட்களில் அவன் மூன்று நாளைக்கு நான்கு வீடுகள் மாற்றிக் கொண்டு இருப்பான். நாங்கள் அவனைக் கேலியாகக் குடிசை மாற்று வாரியம் என்போம். படிப்பு முடிந்ததும் ஆளுக்கு ஒரு பக்கம் போனோம். அடிக்கடி இட மாற்றங்களுக்கு ஆளானோம்.
ஆனால் அவன் மட்டும் இன்னும் ஒரே ஊரில் குப்பை கொட்டிக்கொண்டிருக்கிறான்.
என்னத்தைச் சொல்வது?

தொடர்வதா விடுவதா?

படிக்கிற காலத்தில் அவர் தன்னைத் தனிமைப்படுத்திக் கொள்வார்.
எல்லாரும் தீவிரமாக விளையாட்டாய்ப் பொழுதுபோக்குகையில் நான் தியானம் செய்யப் போகிறேன் என்று கண்களை மூடிக் கொண்டு உட்கார்ந்துவிடுவார்.. எங்காவது வெளி இடங்களுக்குச் சென்றால் அஙகும் தியானத்தில் அமர்ந்துவிடுவார். சூழ்நிலைக்கு ஏற்பத் தன்னைத் தயார்ப்படுத்திக் கொள்கிறாராம்.நாங்கள் வேடிக்கை பார்ப்போம். கிண்டல் செய்வோம்.
காலங்கள் உருண்டோடிவிட்டன.
அந்த நண்பர் தியானம் செய்கிற மாதிரித் தெரியவில்லை.
நாங்கள் செய்து கொண்டிருக்கிறோம்.

பதற்றம் தவிர்

நாங்கள் படித்துக் கொண்டிருந்த காலத்தில் அவர் உழைத்துக் கொண்டிருந்தார். உழைப்பு என்றால் சாதாரண உழைப்பல்ல. உண்மையாகவே நெற்றிவியர்வை நிலத்தில் விழ உழைப்பார். பார்க்கும்போதெல்லாம் மகிழ்ச்சியாகவே இருப்பார்.
இந்த விண்ணப்பத்தில் மேலொப்பம் வாங்க வேண்டும் என்று போய் நிற்போம். அதற்கென்ன .. வாங்கிவிட்டால் போகிறது என்பார்.
இன்றைக்குக் கடைசி நாள்.
பயப்படாதீங்க..
ஒரு வேளை தாமதமாகிவிட்டால்..?
அதெல்லாம் ஒரு கவலையும் வேண்டாம்..
யாரிடம் வாங்கலாம்..
..ரிடம்..
அவர் அலுவலகம் கிளம்பிவிடுவாரே..
வீட்டிலேயே பிடித்துவிடுவோம்..
----------------------------
உறுதியாகச் சொல்வார். சொன்னபடி முடித்துக் கொடுத்துவிடுவார். எங்களுக்குத்தான் பக்..பக் என்று இருக்கும். அவரோ  அலட்டிக்கொள்ளவே மாட்டார்..எந்தச் சூழ்நிலையிலும்..

வலிய வந்து உதவு

சிலரிடம் வலியப் போய்க் கேட்டால் உதவுவார்கள்.
இவர் வலியப் போய் உதவுவார். தனக்கு அந்த வாய்ப்பைத் தந்தமைக்காக அவர்களுக்கு நன்றியோடு இருப்பதாகச் சொல்வார்.
பல ஊர்கள், மாநிலங்கள், நாடுகளில் நண்பர்கள் இவருக்கு உண்டு. அவர்களில் ஒரே ஒருவர் கூட இவரால் இழப்பை எதிர்கொண்டார் என்கிற சரித்திரமே கிடையாது என்பார். ஆதாயத்திற்காக மட்டுமே நட்பு என்கிற இந்தக் காலத்தில் இப்படியும் ஒரு மனிதர்.
எனது நண்பர்களில் எவர் மீது்ம் எனக்கு வெறுப்பு இல்லை என்பார். யாராலும் தமக்குத் துன்பம் வந்ததில்லை என்றும் கூறுவார்.
இவருடன் நட்பாய் இருப்பது எல்லாருக்கும் நல்லது என்று பலரும் பரிந்துரைப்பார்கள். அது உண்மை என்று தெரிந்திருப்பதால்.

முயன்று பார்க்கலாமே..

மீனைக் கொடுப்பதை விடவும் மீன்பிடிக்கக் கற்றுக் கொடுப்பது மேல் என்பார்கள். இவர்கள் அந்த இரகம்.குழந்தைகளுக்கு நல்ல பழக்க வழக்கங்களைக் கற்றுக் கொடுப்பதில் இந்த வயதிலும் இவர் சுறுசுறுப்பான இளைஞர். எப்போதும் எதிர் மறைச்சொற்களைத் தவிர்க்க வேண்டும் என்பதில் ஈடுபாடு கொண்டவர்.நெய் இல்லா உண்டி பாழ் என்பதையே நெய்யுடன் உண்பது மேல் என்று திருத்திக் கொண்டால் என்ன என்பார்.
சாலையைக் கடக்க வேண்டுமா? இருபுறம் பார்த்து மறுபுறம் நட என்பார். இது குழந்தைகளுக்கு மட்டுமான அறிவுரையாக எடுத்துக் கொள்ள முடியாது. பெரியவர்களுக்கும்தான்.

தகவல் அளிக்கிறீர்களா?

தகவல் அளிப்பு
நீங்கள் பாட்டுக்குக் கடிதங்களை அனுப்பிக் கொண்டே இருக்காதீர்கள். மறு முனையில் இருந்து எந்தவிதப் பொறுப்பான பதிலும் வரவில்லை என்றால் எதற்காக அனுப்பிக் கொண்டே இருப்பது? அறிந்தவர், அங்கீகரிப்பவர்களை மட்டுமே  தொடர்பி்ல் வைத்திருங்கள் என்பார் சி.இரா.
உழைப்பு யாருடையதாக இருந்தாலும் அது விரையமாக்கப்படுவதை விரும்ப மாட்டார். வெளியூர் வந்திருக்கிறாரா..“தம்பி..நான் இன்ன இடத்தில் இருக்கிறேன்.. இத்தனை மணிக்குப் புறப்படுவேன் ”என்று வீட்டுக்குத் தகவல் கொடுத்துவிடுவார். அவர்கள் என்னவோ ஏதோவென்று பதற்றம் கொள்ள இடம் கொடுக்க மாட்டார்.
கடிதங்கள், மின்னஞ்சல்கள், தொலை,அலைபேசி விசாரிப்புகள் என எதற்கும் பொறுப்பான, நேரப்படியான பதில்களை அளிப்பார். இது அவரிடமிருந்து எவரும் கற்றுக் கொள்ளத் தக்க பாடம்.

பத்து நிமிடம் பேசப் பத்து மணி நேரப் பயணம்

பயணம் இவருக்குப் பிடித்தமான தொழில்.
வெறும் பயணம் அல்ல. தேடலுடன் கூடிய பயணம். யாருக்கேனும் பயன்படக் கூடிய பயணம். முன்னதாகவே திட்டமிட்டு மேற்கொள்ளப்படு்ம பயணம். இன்று இன்ன இடத்தில் இன்னாரைச் சந்திக்க இயலுமா என்று அனுமதி கேட்டு அதன்படி செயல்படுத்தப்படும் பயணம்.
சந்திப்பின்போது என்னென்ன பேச வேண்டும்என்பதைக் குறித்துக் கொண்டு வந்திருப்பார் சி.இரா. ஒவ்வொன்றாய்ப் பேசி முடித்ததும் விடை பெறுகிறேன் என்று புறப்பட்டு விடுவார். பயணம் வந்ததே பல மணி நேரமாக இருக்கும். பயனுள்ள பேச்சாக இருந்தால் பத்து நிமிடம் பேர்தும் என்பார். மீண்டும் அடுத்த பயணத்தைத் துவக்கிவிடுவார்.
சின்ன விசயமாகத் தோன்றும். சிந்தித்தால் சிக்கனம் விளையும். பார்த்துக் கற்றுக் கொள்ள வேண்டிய பல உத்திகளுள் இதுவும் ஒன்று.

புத்தகப் பிரியர்..

இந்தப் புத்தகத்தைப் படியுங்கள்..அது உங்களுக்குப் பயனுள்ளதாக இருக்கும்..
கிடைக்கவில்லை என்றால் சொல்லுங்கள்.. நான் தேடிப்பிடித்துத் தருகிறேன்.. என்பார் சி.இரா.
வெளியூர் சென்று திரும்பும் போதெல்லாம் விதவிதமான புத்தகங்களை வாங்கி வருவார். படிக்கத் தருவார். பரிசளிப்பார். புத்தகம் வாங்குவதற்கென்றே ஒரு குறிப்பிட்ட தொகையை ஒதுக்கிவிடுவார். நிறையச் சேர்ந்துவிட்டால் யார் பயன்படுத்துவார்களோ அவர்களுக்குக் கொடுத்துவிடுவார். அவர்களுக்குப் பயன்படுகிறதா என்பதை அக்கறையோடு விசாரிப்பார்..படிப்பவர்களுக்கு மட்டுமல்லாமல் எழுதுபவர்களுககும் இந்தப் பொருள் குறித்து எழுதுங்களேன் என்று ஆலோசனை சொல்வார்.
பள்ளி மாணவ, மாணவியருக்கு இவர் அளித்த புத்தகப் பரிசுகள் ஏராளம்.

இனிய மனிதர் ..8

நான் உங்கள் அலுவலகத்திற்கு வந்திருக்கிறேன்.
அப்போது நாங்களே தயாரித்த பால்பாயின்ட் பேனா ரீபில்களை விற்பதற்காக அணுகி இருக்கிறேன்..
என்றார் சி.இராவின் புதல்வர் திரு பாரி.
அப்போது பாரிக்குப் பத்துப் பதினைந்து வயது இருந்திருக்கலாம்.
பார்த்ததாக எங்களுக்கு நினைவில்லை.
கண்டிப்பாக வாங்கியும் இருக்க மாட்டோம். எந்தக் காலத்தில் நாம் உள்ளுார்த் தயாரிப்புகளைப் பொருட்படுத்தி இருக்கிறோம்?
சிஇரா தமது மக்களுக்குச் சூட்டிய பெயர்கள்
பாரி அன்பு அறிவு
பிள்ளைகளுக்குத் தமிழில் பெயர் வையுங்கள் என்று கேட்டுக் கொள்வதையே கூடத் தமது தொண்டுகளில் ஒன்றாக வைத்துக் கொண்டிருக்கிறார் சி.இரா.
சுரேஷ்களும் மகேஷ்களும் கேட்டால்தானே?

நல்லாசிகளைத் தேடுவது முக்கியம்

வயதானவர்களைச் சுற்றுலா அழைத்துச் செல்வது.
இதை அவர் வணிக நோக்கில் துவக்கவில்லை என்பது கவனிக்கத்தக்கது.
” இராமலிங்கம்..நீதான் விவரம் தெரிந்த ஆளாக இருக்கிறாயே.. நாங்களெல்லாம் பல ஊர்களைப் பார்க்கவே இல்லை.. எங்களைக் கூட்டிக் கொண்டு போய்க் காட்டேன்” என்று கேட்டுக் கொண்டவர்களுக்கு உதவுவதற்காக இவர் ஆரம்பித்த சுற்றுலாப் பயணங்களால் பலன் பெற்றவர்கள் பலர்.
அதனால் கிடைத்த பணப்பயனைக் காட்டிலும் அவர்களது மனமார்ந்த ஆசிகள் தமது வளர்ச்சி்க்குப் பெரிதும் உதவியதாகச் சொல்வார் இவர்.
இவருடன் சுற்றுலா சென்றால் பாதுகாப்பாகச் செல்லலாம். சிக்கனமாக அமையும். பார்க்க வேண்டிய இடங்களைத் தவற விடாமல் பார்க்கலாம் என்கிற நற்பெயர் பரவலாயிற்று.
“நான் உங்கள் ஊருக்கு அருகிலேயே இருந்திருக்கிறேன்..தெரியுமோ?” என்றார். ஏன் எங்களுக்குத் தெரியாமல் போயிற்று?

இனிய மனிதர்..6

அவருடைய உறவினர் ஒருவருக்கு வெளிமாநிலத்திலிருந்து அனுப்பி வைக்கப்பட்ட சரக்கு ஒன்று வந்து சேரவில்லை. போக்குவரத்து நிறுவனம் என்னென்னவோ சாக்குப் போக்குகளைச் சொல்லித் தட்டிக்கழித்துக் கொண்டிருந்தது.
சரக்கைப் பெற வேண்டியவர் சலித்துப் போய்விட்டார். இனி அதைப் பெறவே வழி இல்லை என்று தளர்ந்துவிட்டார். இது குறித்துப் பேச்சு வாக்கில் சி.இராவிடம் தெரிவித்திருக்கிறார்.
சி.இரா எல்லா விவரங்களையும் முறைப்படி திரட்டி, எழுதிய கடிதத்திற்குப் பலன் கிடைத்தது. சரக்குக்குரிய தொகையை நண்பருக்குப் பெற்றுத் தருவதில்  சளைக்காது பாடுபட்டார் சி.இரா.
இப்படி எத்தனையோ கை நழுவிப் போன சொத்துக்களை மீட்டுக் கொடுத்ததில் அவருக்கு ரொம்பவும் நல்ல பெயர்.
அதைவிட நல்ல பெயர் அவருக்கு வேறொரு வகையிலும் கிடைத்து வந்தது. அது..

இனிய மனிதர்..5

எதிர்பாராத இடத்தில் எதிர்பாராத நேரத்தில் சந்திப்பது என்பது எல்லாருக்கும் வாய்க்காது.எனக்கு வாய்த்தது. இவர் வெளிநாடு சென்று வந்த கதையை விவரித்தார். கதை கேட்கும் ஆர்வம் யாருக்குத்தான் இல்லை..?
என்ன வித்தியாசம்.. கதைகள் வேறு வேறு விதத்தில் இருக்கும். இது இவரது பயணக் கதை.
இன்ன தேதியில் இந்த இடத்திற்கு வந்தால் எங்கே தங்க முடியும்? நண்பர்கள் வட்டாரத்தில் விசாரிப்பார். தகவல்களைத் திரட்டுவார். முன்னதாகவே தெரிவிப்பார். சொன்னபடி போய் இறங்குவார்.
சிக்கனத்திற்குப் பெயர் பெற்றவர்( பெரியாரின் சீடர் என்பதால் கேட்கவே வேண்டாம்). வெளிநாடுகளில் பணம் கொடுத்து விருந்தினராகத் தங்கும் வசதிகள் ஏராளம். பிரபல விடுதிகளில் தங்குவதை விட இது செலவு குறைவாக ஆகும். இவர் எப்படித் தங்கினார் என்பதைச் சுவைபட விவரிப்பார். நாமே போய் வந்த மாதிரி இருக்கும்.
கதை சொல்லிகள் கவர்ந்திழுப்பது இப்படித்தானே.. இவரிடம் நல்ல பல கதைகள் கிடைக்கும். எண்ணிலடங்காப் பேருந்துகளுக்குச் சொந்தக்காரராக இருந்தவர் எப்படி ஓட்டாணடிஆனார் என்பதை இவர் விவரிக்க ஆரம்பித்தால் அதில் சத்தியமான உண்மை இருக்கும்.. அதனால்தான் அவரிடம் கதை கேட்கப் பிடிக்கிறது. ஆகவே..

இனிய மனிதர்..4

வேறு ஒரு வேலையாகத் திருநரைய10ர் செல்ல வேண்டி இருந்தது. பக்கத்தில்தான் நாச்சியார்கோவில் என்பது வரை தெரியும். சந்திக்க வேண்டி இருந்தவரைச் சந்தித்து முடித்தபி;ன் சி.இரா வைப் போல் பார்ப்போம் என்று நினைத்திருந்தேன்.
யாரும் நம்ப மாட்டார்கள். நாங்கள் பேசிக் கொண்டிருந்த அதே இடத்திற்குத் தற்செயலாக வந்து நின்றார் சி.இரா. எதிர்பாராத சந்திப்பு. இன்ப அதிர்ச்சி. ஊரைச் சுற்றிக் காட்டினார். அந்த ஊரில் பித்தளைத் தொழில் நடைபெறும் விதத்தைச் சுட்டிக் காட்டினார். அதன் வளர்ச்சிக்குத் தம்மால் இயன்ற பணிகளை எப்படியெல்லாம் நிறைவேற்றினார் என்று விளக்கினார்.
ஊர்க்காரர்கள் அவருக்கு அளித்த வரவேற்பும் மரியாதையும் அவர் எப்படிப்பட்ட மனிதர் என்பதற்குக் கட்டியம் கூறின.  இந்த மனிதர்தான் இந்தோனேசியா சென்றிருக்கிறார். மலேசிய மண்ணைத் தொட்டிருக்கிறார். இந்தியக் கை வினைப் பொருட்களின் மதிப்பை எங்கெங்கோ பரப்பி இருக்கிறார்.
வட இந்தியாவில் ஜகாத்ரிää மொராதாபாத் ஆகிய இடங்களை எல்லாம் அடுத்த தெருவுக்குச் சென்று வருவது மாதிரிப் பயணித்திருக்கிறார். அந்த ஊர்க்காரர்களின் பிரதிநிதியாக அயல்நாடுகளுக்குச் சென்று வந்திருக்கிறார். அந்த அனுபவங்களைக் கேட்டால் இன்றைக்கெல்லாம் கேட்டுக் கொண்டே இருக்கலாம். அதற்கு முன்..

இனிய மனிதர்..3

"நான் உங்களுக்கு நிச்சயமாகப் பல நல்ல உத்திகளைக் கற்றுத் தர முடியும். நீங்கள் செய்ய வேண்டியதெல்லாம் இதுதான். ரூ3க்கான அஞ்சல்தலையுடன் எனக்குக் கடிதம் எழுதவேண்டும்". இப்படிச் சொல்கிறவர்களுக்கு எதிரில் நிற்பவர்கள் எல்லாருமே உடனே கணக்குப் புலிகள் ஆகிவிடுவார்கள்.
ஒரு ஆளுக்கு ரூ3 என்றால் ஒரு நாளைக்கு எத்தனை 3 ரூபாய்கள்..அடேயப்பா.. இவரல்லவா எளிதில் பணம் சம்பாதித்துவிடுவார் என்றுதான் கணக்குப் போடுவார்கள். நான் அப்படி நினைக்கவில்லை. ஏனெனில் எனக்குத் தெரியும். பதில் கடிதம் போடுவதற்கே அதற்கு மேல் செலவாகும் என்று. எனவே அந்த ரூ3 அஞ்சல் தலைகளுடன் என்னைப் பற்றிய குறிப்புகளையும் எழுதி அனுப்பி வைத்தேன்.
பதில் வந்தால் வரட்டும். வராவிட்டாலும் பரவாயில்லை என்று காத்திருந்தேன். பொறுப்பான பதில் வந்தது. அதன்மூலம் நான் கோடிகளில் புரண்டேனா என்பதைக் காட்டிலும் ஒரு நல்ல மனிதரின் நட்புக் கிடைக்க அது காரணமாக அமைந்தது என்பதுதான் முக்கியம். அவரை அடுத்துச் சந்திப்பது எப்போது என்று கனவு கூடக் காணவில்லை. ஆனால் அது நடந்தது..

இனிய மனிதர்..2

அவரே சொல்வார்..எங்கள் சமூகத்தில் கல்லுாரியை எட்டிப் பார்க்கிறவர்கள் குறைவு என்று.
இவர் பட்டம் பெற்றதில் இவரைக் காட்டிலும் இவரது உறவினர்களுக்கு மிகுந்த மகிழ்ச்சி என்பார். அதனால் அவர்களே இவரை பி.காம் என்ற பட்டத்துடன்தான் அழைப்பார்கள்.
இவர் வருமானவரித்துறையில் முக்கியப் பதவியில்இருந்திருக்கிறார். அதை உதறிவிட்டுச் சொந்தத் தொழில் செய்ய இறங்கி இருக்கிறார். இவர் கொஞ்சம் விவரமானவர் என்கிற காரணத்திற்காக இவரைக் கூட்டாளி ஆக்கிக் கொண்டவர்கள் படு விவரமாக இருந்திருக்கிறார்கள்.
இழப்புடன் வெளியேற நேர்ந்திருக்கிறது. இருந்தாலும் இவரிடம் கை வசம் தொழில் இருந்தது. பித்தளைப் பாத்திர வியாபாரத்தில் இறங்கி இருக்கிறார். அதில் எண்ணற்ற உத்திகளை இவராகவே உருவாக்கி வெற்றிகரமாக இயக்கியும் இருக்கிறார். படிக்கிற காலத்திலேயே பல சாதனைகளுக்குச் சொந்தக்காரராக இருந்திருக்கிறார். அவை..